مانقو سودان _ وكالات محليه
حدثنا عن أبرز أعمالك الجديدة؟
الحقيقة هي مجموعة من الأعمال الجديدة، لكن أنا ممكن أتكلم أكتر عن الأعمال الكبيرة ومؤثرة لأنو من ضمنها أغنية للأخ والصديق الشاعر والمخرج قاسم أبو زيد، وهي بعنوان (الهوامش زمن الغنا)، وأيضاً للراحل المقيم الأستاذ خطاب حسن أحمد له الرحمة والمغفرة، ومن أعماله البارزة جداً الأخيرة قمت أنا بتلحينها هي عمل بعنوان (أسباب العسل)، وهناك مجموعة من الأعمال لكن دي كفاية جداً لأنها مميزة.
الهادي الجبل فنان خجول؟
هو سؤال غريب شوية، وصفي بأني فنان خجول، حقيقة أنا بفتكر المسألة ما كدا وأنت مابتقدر تحدد أنو الزول خجول، يمكن يكون يتصف بالهدوء وما دائماً الإنسان في هدوء ولا جامد ولا بكون متحرك أكثر من حركة، وبكون متنوع حسب الموقف الهو فيه ودي صفة بوصفوني بيها، بس أنا ما كدا وأنا ما عموماً ما بحب تتقال (خجول) لي لأنو كلمة ما جميلة.
الهادي حامد أحد الفنانين الذين أضرتهم الغُربة؟
دا سؤال جميل جداً، أنا بفتكر الغربة بالعكس تماماً أنا بالنسبة لي شخصياً ما ضرتني في ناس بضرهم ويكون ماعندهم الاستمرارية ولا هم ماعندهم ماركة التلحين، بس الغربة أسعدتني جداً ممكن تكون من ناحية أنا بعيد في فترة غيابي من الجمهور في السودان، لكن في نفس البلد التي تكون فيها أيضاً في جمهور سوداني وغيرها بجانب الشخص يكتسب حاجات تانية مهمة جداً من ضمنها، دائماً الشخص البكون خارج بلده بكون أكثر تودد والتودد بيساعد في التلحين وهذه الأشياء .
وأنا عندي نصوص ولحنت كثيراً من الأعمال وأنا خارج السودان وبكون أكثر شفافية وأكثر حنية وجاذبية لبلدك، وبتحس بالحاجات دي أكتر من إنك تكون موجود في بلدك ودي كلها عوامل بتخلي الشخص يستمر ويكون أفضل في الغربة، لكن بكون منقطع من الجمهور الفي بلده ومن الحفلات وكدا ودا السبب.
لكن بعد ترجع لبلدك كلها تتلخص وبتقدر تقدم حاجات أحسن في فترة حضورك من الغربة وبتكون استفدت منها.
يقال إنك من المعارضين للنظام البائد لدرجة إيقاف بث أغنياتك الوطنية؟
الحقيقة لم يتم إيقافها، لكن أنا شخصياً ما حاولت أقدم أغاني وطنية في الفترة السابقة وما عجبني النظام البائد وبفتكر أنو مافي زول وطني وبحب بلده يؤيد النظام والوضع الفائت، لدرجة انو السودان اتحطم تحطيماً كاملاً كل الأشياء والبنية التحتية أضر بها، والفنان أكثر إنسان ممكن يكون وطني ويمثل بلده بوطنية صادقة جداً، ويتأثر بكل شي ومعارضتي لنظام البائد شرف بالنسبة لي وهذا طبيعي جداً.
صف لنا علاقتك بالراحل محمود عبد العزيز؟
علاقتي بالراحل محمود عبدالعزيز رحمة الله عليه، تعرفت عليه بعد عودتي من ليبيا وهو كان دائماً بذكرني أخانا الأستاذ والدكتور يوسف حسن صديق، لأنو الدكتور يوسف حسن كان السبب في أغنيات الأطفال ومسارح العرائس كان أبرز الناس في السودان، وأنا جذبني ليهو وكنا ساكنين مع بعض عندما عدت من السفر، وكنا بنمشي المكتب حقه في مركز شباب أمدرمان ونقعد هناك بنشتغل مع بعض، ومحمود هو من ضمن الأطفال الكان بيشتغل معاهو بدربهم وعندو مجموعة من الأولاد والبنات بشتغلوا معاهو وبدأوا يكبروا في الفترة ديك، ومحمود كان كبير بس ماكنت بعرفوا يمكن نحنا اتقابلنا اشتغلنا شغل مسرح العرائس وكان مشتركين معاهو الأطفال وكثير من أغنيات الأطفال الشاركوا معانا ويوسف حسن صديق، وكان له دور كبير في أغاني الطفل تلك الفترة ويمكن حتى هذه اللحظة ومن أغنياته المعروفة (أنا بدري صحيت نومي ومتشكرين مقدرين ودنيتنا الجميلة وجميل وجميلة كانت دي مسرحية). وأيضاً شاركنا معاهو أنا وسمية حسن في “حكاية الورد البمبية” ومجموعة كبيرة جداً من أغنيات الطفل وحقيقة أنا استفدت كتير من الراحل ودي كانت صلتي بمحمود عبدالعزيز.
والحوت فنان حقيقي وصاحب صوت مميز، وقد عمل مع فرقتي الموسيقية وقد سمحت له بترديد أحد أغنياتي بطلب من شركة البدوي للإنتاج الإعلامي، وأصبح صديقي حتى وفاته له الرحمة والمغفرة، وكان معروف فنان بارز جداً ووصل لمرحلة جماهيرية عالية ومافي كلام فيه أكيد، وبعدين من الحاجات البتعجبني فيه انو هو من الفنانين القليلين جدآ بالرغم أنه صغير السن لكن دائماً بحفظ فضل الآخرين عليه، مش أنا وبس كل الناس البقدموا ليهو حاجة كان بحفظ فضلهم عليه وبفتخر بالحاجة دي وهو حببني للصفة دي والكلام عنه كثير محمود.
الجبل مصنف ضمن الفنانين المُقلين في ترديد الأغنيات العاطفية؟
الحقيقة ما كدا، بس أنا بختار نصوصاً ونص البناسبني وفي أي مرحلة في غناء بختلف من المرحلة الفاتت، وأنا علاقتي بالفترة الزمنية في الغناء طبعآ طويلة لكن بداياتي بتختلف من مشيت تاني لقدام وبدأت أحس أنا بختار في كل فترة الحاجة البتناسبني أكثر في المرحلة الأنت فيها، وكمان عامل السن ودي كلها بتأثر تأثيراً كبيراً في اختيارك لأغانيك وأعمالك الفنية وبعد الواحد أصبح واعي أكثر بختار الأشياء البتناسب، لكن في أغنيات كثيرة جداً هي أغنيات وطنية وكأنها زي الرمزية وهي بتكون حاجة معينة وناس بخلوها هي أغنية عاطفية، وليست عاطفية والعكس تمامآ في أغنيات عاطفية والناس بصنفوها أغنيات غير عاطفية.
بحكم أنك ملحن يقال إنك تضع معايير لاختيار النصوص؟
فعلآ ودائما أي ملحن بختار وكررت في السؤال الفات اختياري بمعايير معين يعني لازم أحس أنو كلمة موضوعية ومأثرة جداً بالتالي حتى يتم صياغتها في قالب لحني، لأني بتعب جدآ في اللحن وتصويره في نصوص اللحن يعني لنص ملحن واختياري دائماً بكون من النص ذاته بطلع اللحن والشاعر له دور كبير في تحديد الرؤية مع بعض عشان نطلع النص في قالب لحني ممتاز.
يقال إنك صياد ماهر للأسماك؟
حقيقة أنا بحب صيد السمك لكن ما كنت صياد ماهر، المهم يعني ما بطال في الصيد اعتبريني من الناس الصيادين الماهرين جدآ.
الغناء حرمك من اللعب في صفوف فريق الموردة؟
نحنا كنا في الفترة ديك في الموردة صغار السن وكنا ضمن البراعم لكن انا كنت بغني وبحاول ألعب كورة أيضاً.
